top of page
Search
  • Writer's pictureHong Kong Aid UK

【Poppy關我哋香港人咩事?】



今個禮拜日,即係十一月十一號就係國殤紀念日(Remembrance Day),傳統上依一日係紀念第一次世界大戰期間捐驅嘅所有軍民。各國都有相應嘅紀念活動,例如戰時同屬協約國陣營嘅英國、葡國、日本等。而英國(及其殖民地同自治領)嘅傳統就會心口左上戴朵poppy 花以作紀念。二戰之後,十一月十一號就變為同時紀念兩次大戰嘅殉難者。


由於元大英帝國國土遼闊,唔同地區嘅戰時經驗亦有唔同,因此即使英國本部傳統上多只會響五月(二戰歐戰勝利日)及十一月扣上poppy。而亞太地區則同時會響八月(即二戰終戰紀念日),澳洲及紐西蘭則會再響四月嘅澳紐軍團日戴花。


可惜嘅係唔少人會因為poppy 花習俗遍及元大英帝國國土,而將其同殖民主義掛勾。認為戴花等同「戀殖」,事實上香港人響兩次大戰嘅參與程度遠超唔少人嘅想像,除咗耳熟能詳二戰期間響香港保衛戰守護香港、由粵漢加葡澳英蘇印等多族共組嘅香港守軍之外。響香港淪陷後,最少兩支由元香港守軍再編成嘅部隊一直活躍至終戰,例如主要負責敵後日軍情報嘅英軍服務團(BAAG)及駐紮印緬地區前綫嘅香港志願連。而去到戰爭末期,英軍香港軍人甚至計劃反攻「光復香港」,只係計劃實行前日本就已經投降。


之但係總會有人反駁十一月最初係紀念一戰,一戰係殖民國家之間嘅戰爭,關香港咩事?


其實唔只二戰,一戰期間英國海軍入邊早已有唔少香港人服役,最特別嘅係服役於「俄羅斯女皇號」嘅海軍水兵。依艘輔助巡洋艦主要負責由亜太地區運送澳紐軍團至紅海前綫。亦即係話,其實日後為咗紀念紅海戰塲慘況而設嘅澳紐軍團日都唔係完全同香港人無關嘅。


所以簡單咁樣講一句、流散在外嘅香港人,唔理係英國、澳洲、紐西蘭、加拿大,抑或同英聯邦無關嘅葡國、日本。其實十一月對依啲國家黎講,都曾經或者仍然係紀念和平嘅日子,咁樣並唔係「戀殖」、「白人崇拜」。而其實只係回歸最基本紀念曾經為咗香港而犧牲嘅所有前人,十一月十一號唔係「戀殖節」,更唔係本身都有參與一戰嘅中國宣傳嘅「光棍節」,而係一個俾我哋懷念同尊重嘅「和平紀念日」。

30 views0 comments

Comments


bottom of page